الرئيسية / استشارات / قسم الأطفال “القيء والإسهال عند الأطفال”

قسم الأطفال “القيء والإسهال عند الأطفال”

كتبت/ كميائية الشيماء خميس

لقاء مع د// محمد عبده استشاري الأطفال
الدكتور بكلية طب جامعة المنصورة

عند وجود القيء والإسهال عند الطفل:

أول حاجة بنشوف الترجيع-القئ- معاه أعراض تانيه ولا لأ ،، لو ترجيع بس ،، بنصبر على الطفل ٦ ساعات كده -نريح المعده.

الترجيع اتكرر:

لو رجع بشكل متكرر خلال ال٦ ساعات ممكن ندى حقنة ترجيع -دانسيت او زوفران- الجرعه ٣/٤ سم لكل ١٠ كيلو من وزن الطفل،، بعد كده هنصبر نص ساعه ونجرب بسكوت بشاى مثلاً ،، لو مرجعش ،، يبقى كان Viral gastritis -برد ف المعده- ،، أو عك ف الأكل overfeeding وخلصت خلاص .

لو في أعراض تانية زى الإسهال ،، ولازم يكون اسهال محترم – يعنى اكتر من مرة وسايل وريحته وحشه- وغالباً اكتر من الترجيع ،، احنا كده داخلين في نزلة معويه حاده ،، ندى نانازوكسيد وسلفوزنك ومحلول جفاف ، مع الإبره لو الترجيع أوڤر طبعاً..

٩٩،٩٩٩٩٩٩٩٩٩٩٩٩٩ ٪ من أسباب القئ والإسهال ڤيروسية، يعنى مفيش أى لازمة للأنتى بيوتك إلا لو الإسهال فيه دم مع حرارة عالية ،، او مزرعة البراز مبينه بكتيريا ،، يعنى مش كل اما الواد يرجع ويسهل نرزعه سيفوتاكس وسيفوبيد أجدعان

ببساطه كده ،، لو الترجيع عنيف “بينتُر-بيقذف-لقدام” ،، أو فيه دم ، أو لونه أصفر أو أخضر ، أو معاه حرارة عاليه ، أو شحوب ودوخه وعطش(جفاف) ، أو فقدان وعى ، أو ألم شديد بالبطن ، أو براز مدمم ،، او بيرجع باستمرار رغم الحقنة ، انسى كل اللي فات وانزلي اكشفى عشان ممكن ابنك يحتاج حجز مستشفى فوراً☝

الفخ الفظيع:

ابنك بيرجّع ؟؟ وشه “بهت” فجأة ؟؟ قواه خارت ،، نشاطه قلّ؟؟ بصى بسرعه على البول او لون الحفاضة ،، ؟ غامق او زى الشاى ؟؟ بصى على لون عينه ،، أصفر ؟؟

خلى بالك جداً دى أنيميا الفول ،، أو التهاب كبدى أ ،، لازم صورة دم وانزيمات كبد فوراً ، وطبعاً دكتور !!!

الإسهال مطول فوق ١٤ يوم:

لأ ،، كده بأه يبقى ندخل في حساسيات ،، حساسية لاكتوز ،، حساسية لبن ،،،، بكتيريا متكاثرة ف الأمعاء الدقيقة Bacterial overgrowth ،، او طفيل رخم زى الجيارديا..!!

مش مقبول يا ماميز نقعد نرزع الواد كل شوية فلاجيل وانتينال والاسهال مطول ،، وده مش طبيعى!!

✋🏻مفاتيح القئ (الترجيع)✋🏻

* لوحده وبسيط = زيادة اكل او تهيج جدار معده!
*معاه اسهال محترم= نزلة معوية!
* معاه حرارة عالية= التهابات إيڤيرى وير(حلق ، أذن، بول، رئوى ، زايدة!)
*معاه ألم بطن عنيف وإمساك أو براز مدمم = لازم نستبعد الانسداد المعوى!
*معاه رشح وزكام وكحة = افرازات خلف الانف بتهيج جدار المعده(التهاب جيوب أنفية)!
* قاذف ومعاه تغير ف الوعى = التهابات مخية!

✋🏻علامات الجفاف ونعمل إيه✋🏻

خلى بالك من علامات الجفاف (العطش مع الزن الكتير وذبول العين وقلة التبول وقلة النشاط أو النوم -دايخ ).
ساعتها، ننسى أى حاجة ومننساش محلول الجفاف .. الكيس على ٢٠٠ مل مياه نضيفة،ونعطي الكيس لكل ٤ مرات إسهال.

🍼 الروتا عند الرضع🍼

لو ابنك أقل من ٥ شهور،نصيحة، طعميه مصل الروتا(روتاركس)، الجرعه الأولى بتدى حماية من ٨٥-٩٥٪ من ڤيروس الروتا اللى بيعمل نزلات معوية مُجرِمة -حرفياً،، والمسئول الأول عن وفيات النزلات المعوية ف العالم، تمنه في المصل واللقاح ٣٣٠ جنيه ،، الجرعة التانية بتتاخد بعد الجرعه الأولى بشهر على الأقل ،، وبحد أقصى عمر ٨ شهور للطفل ،، التطعيم سهل جداً، مؤثر جداً ، بالفم ، بس لازم الأم تغسل ايدها بمطهر بعد تغيير
البامبرز لمدة أسبوع ،،

📍ينصح بعدم تناول أي أدوية دون الرجوع للطبيب المختص.

عن عشموذيع-Ashmozea

اضف رد

لن يتم نشر البريد الإلكتروني .

x

‎قد يُعجبك أيضاً

قسم الأطفال “المدرسة والأطفال”

كتبت/ كميائية الشيماء خميس المدرسة والأطفال استعداداً لعام دراسي جديد، بدأ قلق ...

الصحة العامة

كتبت/ كميائية الشيماء خميس HbA1c 🌎 هو معدل السكر خلال الثلاث الشهور ...

منوع

كتبت / كميائية الشيماء خميس ✅النوم لمدة 6 ساعات ونصف يوميا على ...

الأمراض المناعية “FMF2⃣حمى البحر المتوسط”

كتبت/ الشيماء خميس السيد FMF2⃣حمى البحر المتوسط تحدثنا في المقال السابق عن ...

الأمراض المناعية “حمى البحر المتوسط FMF”

كتبت/ كيميائية الشيماء خميس 1⃣ حمى البحر المتوسط FMF حمى البحر المتوسط هو ...

الشخصية 3⃣

كتبت/ كميائية الشيماء خميس السيد ماذا يسبب حدوث اضطرابات الشخصية؟: لا يوجد ...

الشخصية 2⃣

كتبت/ كميائية الشيماء خميس السيد الأصناف المختلفة لاضطرابات الشخصية: بينت الأبحاث أن ...

الشخصية

كتبت / كميائية الشيماء خميس  ليس من السهل أن نشرح بدقة ما ...

علاج الخوف عند الأطفال

كتبت/ كميائية الشيماء خميس الخوف عند الأطفال مُشكلة ولها حل، يقع عاتقها ...

قسم الأطفال

كتبت/ كميائية الشيماء خميس في لقاء مع استشاري الاطفال الدكتور/ محمد عبده ...