الرئيسية / مرأة / المرأة والطفل / “طرق لقضاء عيد مميز فى البيت”

“طرق لقضاء عيد مميز فى البيت”

كتبت / ألاء أشرف

سألت بنات كتير هتخرجي فين فى العيد؟، وكانت المفاجأه أنهم مش هينزلوا من البيت تجنبًا للزحمة اللي بتكون سائدة فى العيد بالذات، ومن هنا جتلي الفكرة، ليه منعملش عيد مميز فى البيت؟.

طرق لقضاء عيد مميز فى البيت :-

١- كتير مننا أتبهدل فى رمضان وخصوصًا الناس اللي كانت بتمتحن، أستغلي العيد فى أنك تاخدي راحة مع مشاهدة أفلامك المفضلة والحلويات والفشار.

٢- وطبعًا طبق الكحك والبسكوت مع الشاي بلبن ومسرحية العيال كبرت من الطقوس اللي بتحسسنا بالعيد كل سنة.

٣- أدخلي المطبخ وأعملي وجبات سهلة ولذيذة ليكِ وللأسرة.

٤- اشتري الألعاب المسلية زي الكوتشينة والطاولة والدومينو واستمتعي بيها مع أسرتك.

٥- إتصلي بقرايبك وصحابك اللي مكلمتيهمش بقالك كتير وعيدي عليهم وإحكوا سوا.

٦- لو حسيتي بالوحدة ممكن تكلمي صحابك يقضوا معاكِ اليوم مع فيلم مميز وفشار بالكراميل.

٧- ألعاب الفيديو من الحاجات اللي بتسلي، اتحدي إخواتك أو أصحابك فى الألعاب المختلفة.

٨- ممكن تقرأي رواية جديدة مع كوب الكافيين المفضل ليكِ.

٩- جربي أعملي حاجة جديدة، شوفي فيديوهات لصنع حاجات جديدة زي بالونة الهيليوم بالبيت أو زينة من الورق وغيرها من الحاجات الممتعة.

١٠- ممكن تستغلي أنك فى البيت وتخططي للخروجات اللي بعد العيد وتنسقي الملابس اللي هتنزلي بيها.

١١- ممكن تستغلي العيد فى العناية بشعرك وجسمك وبشرتك عشان تبقي منعشة وجميلة، وده أكيد هيعدِل نفسيتك.

١٢- إستغلي السطوح أو البلكونة فى عمل حفلة شواء مع صحابك.

١٣- رتبي قائمة مميزة للأغاني اللي بتغير مودك والباقي أنتِ عرفاه.

١٤- إذا كنتي من محبين السوشيال ميديا، متنسيش تصوري اللحظات الممتعة وتشاركيها مع صحابك.

إفتكري أن السعادة مش بالخروج وإنك قادرة تستمتعي بكل لحظة فى البيت من العيد، كل سنة وأنتم طيبين.

عن عشموذيع-Ashmozea