الماضي

كتبت/ مريم شديد

مفيش إنسان من غير ماضي، الماضي في حياتنا زي ما بيكون أوقات كتير مؤلم لينا؛ بيكون برده سبب كبير في تجنب ألم أكبر في الحاضر.

تجارب الماضي مش مجرد ذكريات بنفتكرها وخلاص ونضايق منها أو نعيط عليها لأ؛ تجارب الماضي موجودة عشان نتعلم منها، عشان نعرف إحنا غلطنا في إي ومنعملوش تاني، نشوف كان سبب فشلنا سواء في علاقة او دراسة او غيره كان اي وإيه اللي وصلنا لكده.

تجاربك في الماضي علي قد ما كانت واحتمال تكون مازالت مؤلمة ليك علي قد ما هي مهمة جدااا في حياتك في الحاضر والمستقبل.. وهيكون ليها عامل كبير جداا في اجتياز أي مشكلة تواجهك.
كل حاجة بتعدي بيها سواء مشكلة أو فشل أو تجربة فهي بتقويك، كلنا بتيجي علينا فترة ونفتكر إننا خلاص بعد التجربة أو المشكلة دي إحنا اتكسرنا وحياتنا انتهت والدنيا بتقفل في وشنا لكن؛ بالعكس الوقت دا بيبقي بداية جديدة ليك في كل حاجة؛ بداية ليك بشخصيتك البقت أقوى من الفاتت.. بداية جديدة لتعاملك مع الحواليك بس بيكون بقي عندك نضوج عن قبل كدا بتكون قدرت تفهم الناس صح؛ زي ما بنقول بداية جديدة لكل حاجة في حياتك بس وانت عندك مناعة ضد أي حاجة أثرت فيك قبل كدا.

وهي دي فايدة الماضي؛ لما بتفتكره وتفتكر كل اللي مريت بيه وقتها بتتعلم منه وتتفادي أي حاجة ممكن تكسرك أو تأثر فيك تاني، دي فايدة تجاربك وفايدة ماضيك بيعلمك دروس مهمة جداا وفي نفس الوقت بيقويك.

وافتكر إن الماضي اه ممكن يجرحك بس لازم تتعلم منه عشان متتجرحش تاني؛ يا إما تهرب منه وترجع تغلط نفس الغلط تاني وتالت وعاشر.
الإنسان اللي من غير ماضي مالوش حاضر ولا مستقبل.. وفي الآخر بإيدينا نتعلم من الماضي ونفكر ازاى نستخدم اللي اتعلمناه ف اختيار الأحسن متهربش من ماضيك؛ واجهه واتعامل معاه واتعلم منه.

عن عشموذيع-Ashmozea