أذاكِر إزاي؟

كتبت/ آلاء أشرف

خلينا نكون الأول واثقين أن مش كل الحاجات ممكن تنفع وتدي نفس الإستجابة؛ لأن كل شخص وله أسلوبه ودماغه ولكِن فيه أساسيات خلينا نعرف إيه هي.

١- جسمِك وذهنِك:
ودا ماله؟ لأ ده مهم جدًا عشان جسمك لو مش مرتاح مستحيل تعرفي تذاكري، اللي ذاكر وهو واكل خفيف مش زي اللي بتذاكر وهي ضاربه حلة كرنب!، يبقي لازم ناكل أكل خفيف ونبعد عن النشويات والمسبِك والحاجات اللي بتخلي الإنسان مش مركِز ونتجِه للأكل الصحي والخضروات والفواكه، هنبعِد عن البيبسي والمنبهات وهنتجِه للعصاير الفريش والمكسَرات زي عين الجمل لأن الحاجات دي بتنشَط الدماغ وبتساعدك علي التركيز، كمان المشي والتمارين بيساعدوا جدًا.

٢- النوم:
لا النوم الكتير ينفَع ولا سهرك والتطبيق إنجاز، جسمك بيحتاج من ٦ لـ ٨ ساعات نوم عشان يعرف يتحمِل يومك، هتجهديه وتقللي راحته هتلاقي نفسِك بتنسي اللي بتذاكريه وبتنامي على نفسِك أو صاحية بس مش مركزَة، هتديله راحة زيادة هيديكِ كسل يخليكِ فى السرير يومين تلاتة، يبقي نعتدِل.

٣-أذاكِر إمتي:
فكرة الصحيان بدري أهم من المذاكرة بليل ده كلام في مية البطيخ، ذهنِك بيشتغل إمتي؟ بيركِز إمتي؟ بليل يبقي نذاكر بليل، الصبح يبقي نذاكر الصبح مش معادلة ولا قانون لازم الكُل يمشي عليه ده حسب طبيعتك أنتِ.

٤- أذاكِر ليه:
فكرة إنك بتذاكري عشان عندك إمتحان في الدرس يبقي انسي إنك تفتكري اللي ذاكرتيه بعد ما تخرجي من الإمتحان لإنك سستمتي نفسِك علي إنك بتذاكري لحاجة معينة، أفضَل شئ لو يهمِك الخبرة إنك تذاكري كَثقافة يعني بتتعلمي علشان تفهمي وتعرفي مش علشان الفاينال والميدترم ولا المستر هيسمَع.

٥- أذاكِر إزاي:
“المذاكره بالعين”
استخدام الألوان في المذاكرة مهم جدًا وتلوين العناوين كل عنوان بلون بيساعدِك في التذكير يعني إنزلي الفجالة دلعي نفسِك ألوان وإستيكي نوتس “ورق ملون” ميهمكيش خالص.

“المذاكره بالشَم”
أشِم الكتب؟ أكيد لأ.
لو المستر بتاعك بيحُط برفيوم معين وجه بعد سنة شميتي نفس البرفيوم مش هتخافي كده وهتحسي بنفس الرهبة؟ وده اللي هنعمله بالظبط، إحنا هنستخدم برفيوم معين وإحنا بنذاكر علشان لما نشمه في الإمتحان نفتكر القاعدة بتفاصيلها.

المذاكره باللسان أو الكتابة”
ودي إختياري يعني فيه ناس المعلومة بتثبت لو قرأتهَا بصوت عالي كذا مرة وناس المعلومة بتثبت لو كتبت المعلومة كذا مرة، إحنا عشان نضمَن إن المعلومة لزقِت هنجرب الإتنين.

“المذاكره بالسمَع”
ياهنسجِل المحاضرة أو الدرس ونسمعُه فى الطريق بدل الأغاني علشان المعلومة تثبَت لحد ما أروَح يا إما هروح البيت اقرأ اللي خدته بصوتي واسمعُه قبل ما أنام علشان أثبِت اللي حفظته.

عن عشموذيع-Ashmozea