الرئيسية / مرأة / المرأة والطفل / إزاي أنظَم وقتي

إزاي أنظَم وقتي

كتبت / ألاء أشرف

هبدأ كلامي بحكمَة بحبها جدًا “الذي يسئ استخدام الوقت هو أول من يشتكي من قصره”، كانوا بيقولوا زمَان أن اليوم كان طويل عشان كان فيه بركَة، ياتري فعلًا اليوم بيضيع علشان مافيهوش بركَة؟ خلينا نشوف.

وقتك بيضيع بسبب إيه؟
“التصفح علي السوشيال ميديا، عدم تنظيم الوقت، بتصحي متأخر، بتأجل المهام، بتكسِل، بتعمل حاجات مش في وقتها، بتمسك الفون بالساعات قبل النوم..الخ”.

يوم زمان يفرِق إيه عن دلوقتِ؟
البركَة كده كده موجودة، المشكلة فيك أنت، زمان اليوم كان بيبدأ الفجر وينتهي ١٠ بالكتير، دلوقتِ النوم الفجر يعني الفرق واضح جدًا.

إزاي أنظم وقتي :-

١- قائمة المهام:-
سمعت عنها كتير وهتسمع لسَه، مافيش إنسان ناجح يومه ماشي زي ما تيجي، إشتري نوت صغيرة اكتب فيها الصبح ناوي تعمل إيه طول اليوم، أو من قبلها بليل علشان متنساش والنوت دي تبقي معاك في كل حتة، لو زادت مهام تضيفها واللي يتنفِذ هتعمل جنبه علامة صح، وده هيشجعَك تكمل ومتنساش حاجة كان المفروض تعملها، ممكن كمان ننزل أي أبلكيشن To do وهيدي نفس النتيجة.

٢- راقِب نفسَك:-
قبل ما نجيب علاج لازم نشخَص الحالة، هتجيب ورقة وقلم وتراقب يومك ماشي إزاي بدون أي تعديل، من إمتي لإمتي وعملت إيه فالوقت ده؟ علشان نقدر نبعِد عن الحاجة اللي بتلهينا ونحدد هنمشي اليوم إزاي بالظبط، وغالبًا وقتك هيبقي ضايع يا في الكسل يا في الشات مع صحابك أو الفيسبوك بتشوف حاجات ملهاش أي لازمة.

٣- إحترم وقتك:-
الوقت اللي بتضيعه دلوقتِ هتندم عليه بعدين، الفون اللي بتمسكه أول ما تصحي بالساعات وقبل ما تنام بالساعات، بجانب أن ممكن تكون مبتسيبش الفون أصلًا، أنتَ كده بتدمر يومك، اللي شوفته النهاردا هو اللي هتشوفه بكرة، هو اللي هتشوفه بعده، حدد الناس اللي أنتَ حابب تتابعها وخصص وقت معين في آخر اليوم تشوف أخبارهم، أو مسلسل بتحبُه كل يوم حلقة، تنظيم الوقت مش معناه أنك متعملش حاجة بتحبها بس عارف تعملها إمتي وأد إيه يعني بمعني أصَح إحترم وقتك.

٤- ترتيب الأولويات:-
مينفعش يبقي عندي إمتحان بكرة وورايا بحث للأسبوع الجاي وأبدأ في البحث مثلًا، ورقة وقلم ورتِب إيه لازم يتعمل فورًا وإيه ممكن يستني تعمله بعده مش يتأجِل، ده هيخليك تخلص مهامك أسرَع وبدون ضرر.

٥- متعملش حاجتين في نفس الوقت:-
أسوأ حاجة ممكن تضيع بيها وقتَك أنك تحاول تنفذ مهمتين في نفس الوقت، ولا المهمتين هيتنفذوا صَح ولا الوقت اللي ضيعته بيرجَع، مينفعش أعمل بحث وأنا واخد بريك بشوف الفيسبوك مثلًا، أنتَ لا أديت البحث حقه ولا عرفت تاخد البريك صَح وتفصل.

٦- الكسل والتأجيل:-
ودول أعداء النجاح واللي هتفضل في صراع معاهم طول ما أنتَ مش مقدَر وقتك ولا منظمُه، الحاجة اللي مش هتتعمل النهاردا مش هتتعمل أبدًا وتأجيلها ده هيقلل من نسبة نجاحها ونسبة التركيز طبعًا هتكون قليلة، أما الكسل فـ ده محتاج دافع زي الشغف والحماس والطاقة الإيجابية علشان متديلوش فرصة يسيطَر عليك.

٧- اشحن طاقتك:-
زي ما هندي وقت للدراسة والشغل والبيت..الخ، نفسَك لازم يكون ليها وقت، مش فيسبوك والكلام ده لأ، جُملة تفاؤلية تبدأ بيها يومك، وقت لليوجا مثلًا، قراءة كتاب إيجابي، تشوف برنامج يشجعَك تكمل حلمَك، تفصِل دماغك وتقعد متفكرش في حاجة خالص وده هيخليك لما تشتغل تاني تبقي قادِر وعندك طاقة لـ ده بدون كسل تمامًا أو ملل.

ملحوظة أخيرة : الوقت اللي بيضيع منك دلوقتِ مش هيرجَع فى المستقبل، الفُرص اللي بتضيع منك دلوقتِ بسبب الكسل مش هترجَع لما تندم، فكَر صح وإستثمر وقتَك.
الاء اشرف

كتبت / ألاء أشرف هبدأ كلامي بحكمَة بحبها جدًا "الذي يسئ استخدام الوقت هو أول من يشتكي من قصره"، كانوا بيقولوا زمَان أن اليوم كان طويل عشان كان فيه بركَة، ياتري فعلًا اليوم بيضيع علشان مافيهوش بركَة؟ خلينا نشوف. وقتك بيضيع بسبب إيه؟ "التصفح علي السوشيال ميديا، عدم تنظيم الوقت، بتصحي متأخر، بتأجل المهام، بتكسِل، بتعمل حاجات مش في وقتها، بتمسك الفون بالساعات قبل النوم..الخ". يوم زمان يفرِق إيه عن دلوقتِ؟ البركَة كده كده موجودة، المشكلة فيك أنت، زمان اليوم كان بيبدأ الفجر وينتهي ١٠ بالكتير، دلوقتِ النوم الفجر يعني الفرق واضح جدًا. إزاي أنظم وقتي :- ١- قائمة المهام:-…

عناصر المراجعه :

تقييم المستخدمون: كن أول المصوتين !

عن wafaa mahmoud