(فتة عدس):

شيف / يمنى يسرى .

المقادير:-
ربع كيلو عدس أصفر .
ميه أو شوربه .
بصله متوسطه .
جزره كبيره .
بطاطسايه صغيره .
فصين ثوم .
طماطمايه متوسطه .
رشة فلفل إسود .
ملح .
كمون .
كسبره ناشفه .

الطريقة:-
هنحط الميه او الشوربه على النار وهنغسل العدس ونحطه ونغسل الخضار ونقطعه مكعبات كبيره ونحطه عالعدس ونحط الكمون والكسبره مش كتير عشان مايمررش (الملح والفلفل الأسود يتحط فى حالة إن العدس يكون معمول على ميه لو هنعمله بشوربه مش هنحط ملح وفلفل أسود) . ونغطيه ونهدى عليه بعد ماياخد غلوه ونسيبه يستوى براحته لما يستوى هنسيبه شويه يبرد وبعدين نضربه فى الخلاط كويس وبعدين هنحمر معلقتين شعريه فى معلقة زيت أو سمنه بلدي وننزل عليها بشوربة العدس ونقلبها كويس عشان الشعريه ماتكلكعش وماتلزقش فى قاع الحله ونسيبها خمسه على نار هاديه لحد ماتستوى الشعريه
هنعمل بقى دلوقتى الطشه
هندق فى الهون ٥فصوص ثوم مع نص معلقة كسبره ناشفه ونشوحهم فى معلقة سمنه بلدي او زيت ونطفى عالعدس وننزل عليه بقى بالطشه الحلوه دى ونديها تقليبه كده حلوه ونركنها على جنب خمسايه كده على مانحمص العيش بقى
هنجيب عيش بلدى حوالى ٣ أرغفه او أكتر حسب العدد زى ماتحبى وهنقطعه مكعبات قد بعض بالمقص وهنجيب طاسه كبيره حلوه كده وتكون مابتلزقش ونحط فيها معلقة سمنه بلدي أو زيت ونحط عليهم العيش ونفضل نقلب لحد العيش كله مايتحمص وياخد لون دهبى حلو ويقرمش و نكون مجهزين ٥ فصوص ثوم مدقوق مع رشة ملح ومعلقة كسبره ناشفه ونروح نازلين بالثوم ده عالعيش مع معلقة سمنه كمان عشان الثوم يتشوح ونقلب ثوانى الثوم مع العيش لحد ما ياخد لون ذهبي فاتح نطفى عليهم ونقدم بقى فتة العدس الجامده جدا بتاعتنا
هنحط العدس فى الطبق ونزينه بالعيش المحمص ونقدم علاطول عشان العيش مايطراش فى قلب العدس ونقدم جنبه مخلل اللفت الجامد بتاعنا اللى نزلت طريقته قبل كده وجنبهم شوية بصل أخضر أو بصل أحمر متقطع وعليه عصير ليمون وكل وإستمخمخ بقى وياسلام على أحلى فتة عدس فى الساقعه دى وبعدها كباية شاى بالنعناع ياااااه تدفى المعده وتعمر الدماغ فى ليالى الشتاء الطويله دى يلا بقى قومى بسرعه من تحت البطانيه وإعمليلهم أحلى فتة عدس من أيديكى الحلوين وكلى وإدعيلى بقى وبالهنا والشفا على قلبك.
كنت معاكم شيف يمنى يسرى
من مطبخ يمنى😘😉

عن عشموذيع-Ashmozea