الرئيسية / بالهنا والشفا / (فريك بالسجق)

(فريك بالسجق)

شيف / يمنى يسرى

المقادير:-
نصف كيلو سجق بلدى .
نصف كيلو فريك( الضحى ).
معلقة سمنه بلدي .
معلقة زيت .
بصله متوسطه الحجم مقطعه مكعبات .
٥فصوص ثوم مقطع شرائح .
معلقة فلفل أحمر مفروم ناعم بارد أو حامى حسب الرغبه (هريسه ).
بهارات .
ملح وفلفل أسود .
شوربه .

الطريقه:-
فى حله عالنار هنحط السمنه والزيت وهننزل عليهم بالبصل ونقلب لحد بس مايدبل شويه ننزل عليه بالثوم ونقلب تشويحه سريعه ريحة الثوم بس تطلع مش عاوزينه ياخد لون وننزل عليهم بالفلفل اوالهريسه وبعدين بالسجق البلدى متقطع الحجم اللى تحبيه ويفضل يتقطع وهو متجمد عشان اللحمه ماتخرجش من الهانك وإنتى بتقطعيه ويتفرول منك هتشوحى السجق شويه لحد ماياخد لون من كل ناحيه وياخد صدمه كده هتروحى حاطه عليه الملح والفلفل الأسود والبهارات وتقلبى وبعدين تكونى مجهزه الفريك وضرورى جدا يكون الضحى صدقونى أى نوع تانى هيبوظلك الوصفه لإن انا جربت كل الانواع فيهم ظلط وطين ومش حلوين خالص لكن الضحى نضيف جدا ومش محتاج تنضيف كل الحكايه هتغسليه كويس وتنقعيه بس نرجع للسجق بقى الفريك طبعا غسلتيه ونقعتيه من بالليل فى ميه من الحنفيه او قبلها بساعه فى ميه مغليه وتصفيه وتعصريه كويس جدا وتحطيه عالسجق وتشوحيه معاه شويه زى الرز عادى جدا وبعدين يكون عندك الشوربه بتغلى إسقيه الشوربه بس خلى بالك دى أهم نقطه هنا بقى مقدار الشوربه يادوب فى مستوى الفريك مش مغطيه عشان يطلع معاكى مفلفل ومايعجنش بس وياخد غلوه وتوطى النار عليه خالص وحطى الشياطه وسيبيه يستوى بقى عادى ولما يستوى قدميه وهاتيهولى انا بقى أكلهولك هههههههههههه بالهنا والشفا وجربيه وإن شاء الله هيعجبك جدا .
كنت معاكم شيف يمنى يسرى
من مطبخ يمنى👩‍🍳🍽

عن عشموذيع-Ashmozea